khushi se kaanp rahi thiin ye ungliyaan itni — Fahmi Badayuni

kaash vo raaste mein mil jaae
mujh ko munh pher kar guzarnaa hai

— Fahmi Badayuni

khuun pilaa kar jo sher paalaa thaa
us ne circus mein naukri kar li

— Fahmi Badayuni

pareshaan hai vo jhuTaa ishq kar ke
vafaa karne ki naubat aa gai hai

— Fahmi Badayuni

Tahalte phir rahe hain saare ghar mein
tiri khaali jagah ko bhar rahe hain

— Fahmi Badayuni

aaj paivand ki zarurat hai
ye sazaa hai rafu na karne ki

— Fahmi Badayuni

puchh lete vo bas mizaaj miraa
kitnaa aasaan thaa ilaaj miraa

— Fahmi Badayuni

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

sitam to ye hai ki vo bhi na ban sakaa apnaa
qubul ham ne kiye jis ke gham khushi ki tarah

— Qateel Shifai

us ko sochun to dhyaan mein mere
khushbu aati hai pahli baarish ki

— Vibha Jain 'Khwaab'

kuchh aastinon ki majburiyaan bhi hoti hain
khushi se apni bhalaa saanp kaun paaltaa hai

— Meraj Naqvi

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

— Abu Mohammad Sahar

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

— Bekhud Dehlvi