parastish ki hai meri dhaDkanon ne — Farhat Shahzad

saut kyaa shai hai khaamushi kyaa hai
gham kise kahte hain khushi kyaa hai

— Farhat Shahzad

itni pi jaae ki miT jaae main aur tu ki tamiz
yaani ye hosh ki divaar giraa di jaae

— Farhat Shahzad

zindagi kaT gai manaate hue
ab iraada hai ruuTh jaane kaa

— Farhat Shahzad

ham se tanhaai ke maare nahin dekhe jaate
bin tire chaand sitaare nahin dekhe jaate

— Farhat Shahzad

aziiz mujh ko hain tufaan saahilon se sivaa
isi liye hai khafaa meraa naakhudaa mujh se

— Farhat Shahzad

baat apni anaa ki hai varna
yuun to do haath par kinaaraa hai

— Farhat Shahzad