Farhat Shahzad

apni aankhon mein hasin khvaab sajaae rakkho

اپنی آنکھوں میں حسیں خواب سجائے رکھو لاکھ طوفان اٹھیں شمع جلائے رکھو رات پھر رات ہے اک روز گزر جائے گی صبح کی آس عزائم میں بسائے رکھو خواہش دل کی ہوا تیز بہت ہے یارو آگ پندار کی سینے میں جلائے رکھو جیتنا چاہو تو ہر مات سہو ہنس ہنس کر فکر مایوس خیالوں سے بچائے رکھو یوں ذرا دیر کو دل سے ہی لبھا لیتے ہیں بات تو جب ہے کہ تا عمر لبھائے رکھو تم نے سچ بولا ہے مصلوب تمہیں ہونا ہے اپنے کاندھے پہ صلیب اپنی اٹھائے رکھو گر یہ چاہو کہ عیاں کرب نہ ہو سینے کا جان شہزادؔ نگاہوں سے بنائے رکھو

aamir-e-aql se 'shahzaad' baghaavat kar lein

آمر عقل سے شہزادؔ بغاوت کر لیں آؤ اس شخص سے اقرار محبت کر لیں کل نہ جانے کہ کسے وقت کہاں لے جائے آج پل بھر ہی سہی خواب حقیقت کر لیں اس کو تہمت سے بچانا ہے ہر اک قسمت پر ہنستے رہنا ہی چلو آج سے عادت کر لیں کون منزل کے لئے لطف سفر کو کھوئے چلتے رہنے سے ہی تجدید رفاقت کر لیں ہم نے سب دیپ بجھا ڈالے ہیں امشب تاکہ ساتھ جو چل نہ سکیں ترک محبت کر لیں

aankh ko jakDe the kal khvaab azaabon ke

آنکھ کو جکڑے تھے کل خواب عذابوں کے میں سیراب کھڑا تھا بیچ سرابوں کے تجھ کو کھو کر مجھ پر وہ بھی دن آئے چھپ نہ سکا دکھ پیچھے کئی نقابوں کے فکر کا تن کب ڈھانپ سکی مدہوشی تک چھوڑ دیے نشوں نے ہاتھ شرابوں کے عمر انہی کے ساتھ گزاری ہے جاناں زخم مجھے لگتے ہیں پھول گلابوں کے ایک سوال نے جب سے مجھ کو پہنا ہے شرمندہ ہیں سارے رنگ جوابوں کے کس سے پوچھوں میں رستہ اب تجھ گھر کا منہ تکتے ہیں خالی ورق کتابوں کے جانے پھر کب وقت یہ پل دہرائے گا لگ جا سینے توڑ کے بند حجابوں کے ملک میں میرے امن کی خواہش جان من بکری جیسے بیچ میں سو قصابوں کے ختم نہیں شہزادؔ فقط تجھ پر تخلیق ہم بھی پیارے خالق ہیں کچھ خوابوں کے

dasht-e-vahshat ne phir pukaaraa hai

دشت وحشت نے پھر پکارا ہے زندگی آج تو گوارا ہے ڈوبنے سے بچا کے مانجھی نے درد کے گھاٹ لا اتارا ہے لاکھ تو مجھ سے ہے مگر مجھ میں کب تری ہم سری کا یارا ہے بات اپنی انا کی ہے ورنہ یوں تو دو ہاتھ پر کنارا ہے دل کی گنجان رہ گزاروں میں کرب تنہائی کا سہارا ہے لوگ مرتے ہیں بند آنکھوں سے ہم کو اس آگہی نے مارا ہے جان شہزادؔ زندگی کا سفر ہم نے بے کارواں گزارا ہے

shaam kahti hai koi baat judaa si likkhun

شام کہتی ہے کوئی بات جدا سی لکھوں دل کا اصرار ہے پھر اس کی اداسی لکھوں آج زخموں کو محبت کی عطا کے بدلے تحفہ و تمغۂ احباب شناسی لکھوں ساتھ ہو تم بھی مرے ساتھ ہے تنہائی بھی کون سے دل سے کسے وجہ اداسی لکھوں جس نے دل مانگا نہیں چھین لیا ہے مجھ سے آپ میں آؤں تو وہ آنکھ حیا سی لکھوں مجھ پہ ہو جائے تری چشم کرم گر پل بھر پھر میں یہ دونوں جہاں ''بات ذرا سی'' لکھوں دوڑتی ہے جو مرے خون میں تیری حسرت دیکھ آئینہ اسے خون کی پیاسی لکھوں تجھ سے کیوں دور ہے مجبور ہے شہزادؔ ترا پڑھ سکے تو تو میں سچائی ذرا سی لکھوں

ranj ke haathon giit khushi ke likhvaao to baat bane

رنج کے ہاتھوں گیت خوشی کے لکھواؤ تو بات بنے توڑ کے اشکوں کی زنجیریں مسکاؤ تو بات بنے شور مچاتی آوازوں سے توڑ کے رشتہ پل دو پل خاموشی کی سرگوشی گر سن پاؤ تو بات بنے گلشن میں تو خوشبو ہر سو رہتی ہی ہے گل رت میں صحراؤں میں جاناں غنچے مہکاؤ تو بات بنے مجھ کو ہیر سیال سے مطلب اور نہ رانجھے سے کچھ کام توڑ کے بندھن رسموں کا تم آ جاؤ تو بات بنے بات وفا کی دل والوں کی نگری میں ہے عام بہت شہر بتاں میں گیت وفا کے گا پاؤ تو بات بنے گود میں خوشیوں کی ہر کوئی چین سے سوتا ہے لیکن موند کے آنکھیں غم بانہوں میں لہراؤ تو بات بنے چاند ستارے توڑ کے لانا افسانوں کی باتیں ہیں میرے لئے تو پیار نظر میں بھر لاؤ تو بات بنے