vo jis kaa naam paDaa hai khamosh logon mein — Fawad Ahmad

dil o nazar ki baqaa hai faqat mohabbat mein
dil o nazar se koi aur kaam mat lenaa

— Fawad Ahmad

jo palkon se gir jaae aansu kaa qatra
jo palkon mein rah jaaegaa vo guhar hai

— Fawad Ahmad

be-kaif kaT rahi thi musalsal ye zindagi
phir khvaab mein vo khvaab saa paikar milaa mujhe

— Fawad Ahmad

ruThe logon ko manaane mein maza aataa hai
jaan kar aap ko naaraaz kiyaa hai main ne

— Fawad Ahmad

tum mujhe chhoD ke is tarah nahin jaa sakte
is ta'alluq pe bahut naaz kiyaa hai main ne

— Fawad Ahmad

chaand bhi hairaan dariyaa bhi pareshaani mein hai
aks kis kaa hai ki itni raushni paani mein hai

— Farhat Ehsas

chaand hai paani mein yaa bhule hue chehre kaa aks
saahil-e-dariyaa pe dekho main bhi hairaani mein huun

— Kausar Mazhari

dil ki lahron kaa tul-o-arz na puchh
kabhu dariyaa kabhu safinaa hai

— Shaikh Zahuruddin Hatim

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

— Hasan Abidi

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

— Nazeer Akbar Abadi

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

— Agha Hajju Sharaf