ek hamein aavaara kahnaa koi baDaa ilzaam nahin — Habib Jalib

kuchh aur bhi hain kaam hamein ai gham-e-jaanaan
kab tak koi uljhi hui zulfon ko sanvaare

— Habib Jalib

sher se shaairi se Darte hain
kam-nazar raushni se Darte hain

— Habib Jalib

duniyaa to chaahti hai yunhi faasle rahein
duniyaa ke mashvaron pe na jaa us gali mein chal

— Habib Jalib

aane vaali barkhaa dekhein kyaa dikhlaae aankhon ko
ye barkhaa barsaate din to bin piritam be-kaar gae

— Habib Jalib

kuchh log khayaalon se chale jaaein to soein
biite hue din raat na yaad aaein to soein

— Habib Jalib

ik tiri yaad se ik tere tasavvur se hamein
aa gae yaad kai naam hasinaaon ke

— Habib Jalib

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri