sunte hain us ne DhunD liyaa aur koi ghar — Jamal Ehsani

vo bhi milne nai poshaak badal kar aayaa
main jo kal pairahan-e-khaak badal kar aayaa

isi ik baat par hai ittifaaq-o-ikhtilaaf us se
use aaina aur mujh ko piyaala achchhaa lagtaa hai

maaein darvaazon par hain
baarish hone vaali hai

mere hone se na honaa hai miraa
aag jalne se dhuaan aabaad hai

bojh se jhukne lagi shaakh to jaa kar ham ne
aashiyaane ko kisi aur shajar par rakkhaa

kuchh aur vus'atein darkaar hain mohabbat ko
visaal-o-hijr pe daar-o-madaar mushkil hai