badlegi kaaenaat miri baat maan lo — Jameel Usman

kis ne kahaa hai tum se ki taa-umr saath do
hai chaar din ki baat miri baat maan lo

— Jameel Usman

hai zindagi baghair tumhaare ik iztiraab
de do ise sabaat miri baat maan lo

— Jameel Usman

so jaaiye huzur ki ab raat ho gai
jo baat hone vaali thi vo baat ho gai

— Jameel Usman

ham raaz-e-dil chhupaate magar apni zindagi
puuri khuli kitaab agar ho to kyaa karein

— Jameel Usman

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal