is qadar mahv na hon aap khud-aaraai mein — Kalb

chaalis jaam pi ke diyaa ek jaam-e-mai
saaqi ne khuub raah nikaali zakaat ki

ik baat par qaraar unhein raat-bhar nahin
do do pahar jo haan hai to do do pahar nahin

agar un ko puujaa to kyaa kufr hogaa
ki but bhi khudaa ke banaae hue hain

tiri taarif ho ai sahib-e-ausaaf kyaa mumkin
zabaanon se dahaanon se takallum se bayaanon se

na khanjar uThegaa na talvaar in se
ye baazu mire aazmaae hue hain

phir na baaqi rahe ghubaar kabhi
holi khelo jo khaaksaaron mein