ham to baiThe hi rahe apni asiri ko liye — Kaleem Ahmadabadi

chheDti hai mujhe aa aa ke miri aazaadi
go main qaidi huun mire paanv mein zanjir bhi hai

— Kaleem Ahmadabadi

jaane kyaa bhar di hain us ne is chaman mein shokhiyaan
jo bhi aayaa vo chaman kaa raaz-daan bantaa gayaa

— Kaleem Ahmadabadi

tumhin bataao ki is dil kaa kyaa kiyaa jaae
jo choT khaa ke bhi choTon se aashnaa na huaa

— Kaleem Ahmadabadi

sitaare toD liye ham ne zuhd-o-taqvaa ke
magar jo haqq-e-ibaadat thaa vo adaa na huaa

— Kaleem Ahmadabadi

khud kham-o-pech tujhe raah ke batlaa deinge
teri Thokar mein tiraa sud-o-ziyaan hai ki nahin

— Kaleem Ahmadabadi

gham natija hai khushi ki intihaa kaa ai 'kalim'
dil ki ik ik mauj mauj-e-shaadmaani ho to kyaa

— Kaleem Ahmadabadi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid