abhi sar kaa lahu thamne na paayaa — Mahshar Badayuni

main itni raushni phailaa chukaa huun
ki bujh bhi jaaun to ab gham nahin hai

— Mahshar Badayuni

ham ko bhi khush-numaa nazar aai hai zindagi
jaise saraab duur se dariyaa dikhaai de

— Mahshar Badayuni

ab havaaein hi kareingi raushni kaa faisla
jis diye mein jaan hogi vo diyaa rah jaaegaa

— Mahshar Badayuni

jis ke liye bachcha royaa thaa aur ponchhe the aansu baabaa ne
vo bachcha ab bhi zinda hai vo mahngaa khilaunaa TuuT gayaa

— Mahshar Badayuni

har patti bojhal ho ke giri sab shaakhein jhuk kar TuuT gaiin
us baarish hi se fasl ujDi jis baarish se tayyaar hui

— Mahshar Badayuni

kare dariyaa na pul mismaar mere
abhi kuchh log hain us paar mere

— Mahshar Badayuni