main itni raushni phailaa chukaa huun — Mahshar Badayuni

ham ko bhi khush-numaa nazar aai hai zindagi
jaise saraab duur se dariyaa dikhaai de

ab havaaein hi kareingi raushni kaa faisla
jis diye mein jaan hogi vo diyaa rah jaaegaa

jis ke liye bachcha royaa thaa aur ponchhe the aansu baabaa ne
vo bachcha ab bhi zinda hai vo mahngaa khilaunaa TuuT gayaa

har patti bojhal ho ke giri sab shaakhein jhuk kar TuuT gaiin
us baarish hi se fasl ujDi jis baarish se tayyaar hui

abhi sar kaa lahu thamne na paayaa
udhar se ek patthar aur aayaa

kare dariyaa na pul mismaar mere
abhi kuchh log hain us paar mere

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ye aansu ponchh lijiye aur muskuraaiye
chaara nahin hai koi bhi rukhsat kiye baghair

husn jalva dikhaa gayaa apnaa
ishq baiThaa rahaa udaas kahin

main ne apni palkon par gham-kade sajaae hain
aarzu ke maatam mein sogvaar hasti hai

ham haal to kah sakte hain apnaa pa kahein kyaa
jab vo idhar aate hain to tanhaa nahin aate