jo mere banne se pahle ik intizaar banaa — Miraash

thi kal dayaar-e-'ishq mein 'iduzzuhaa 'miraash'
ham kyaa galaa kaTaate 'ajab bheD-chaal thi

— Miraash

ghar palaT kar jo miri raushan-khayaali aai hai
shor hai shahr-e-sukhan mein phir divaali aai hai

— Miraash

khanak rahaa huun main nashshe mein chaabiyon ki tarah
khuli hai pyaas magar mai-kade pe taalaa hai

— Miraash

kis gardish-e-paiham mein miraa sho’la-e-dil hai
jaltaa hai lahu roghan-e-khurshid ki surat

— Miraash

khutut aag mein jalte hain aur sikhon par
kisi kaa dil to jigar hai kisi parinde kaa

— Miraash

gard aainon ki chaaron taraf hai jami hui
'aalam 'ajib shisha-gari ki dukaan hai

— Miraash

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

kisi ke raste pe kaise nazrein jamaae rakkhun
abhi to karnaa mujhe hai khud intizaar meraa

— Alam Khursheed

phir baiThe baiThe vaada-e-vasl us ne kar liyaa
phir uTh khaDaa huaa vahi rog intizaar kaa

— Ameer Minai

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi

jaan-sapaari daagh katthaa chunaa hai chashm-e-intizaar
vaaste mehmaan gham ke dil hai biiDaa paan kaa

— Siraj Aurangabadi