koi us but saa zamaane mein nahin — Mohammad Naazir Ali Naazir

hai ye taakid ki ham ko na sataae koi
kaise phir un ko kaleje se lagaae koi

— Mohammad Naazir Ali Naazir

sharar-e-naala-e-bulbul se lagi un mein aag
jo shajar baagh mein the phulne phalne vaale

— Mohammad Naazir Ali Naazir

asiraan-e-qafas par zulm to sayyaad karte hain
ki un ke par katar lete hain tab aazaad karte hain

— Mohammad Naazir Ali Naazir

khudaa ki shaan ki ham ko uThaa ke mahfil se
raqib baiThe hain zaanu tiraa dabaae hue

— Mohammad Naazir Ali Naazir

kucha-e-yaar mein jaane ki kabhi khu na gai
Thokarein khaa ke bhi sambhle na sambhalne vaale

— Mohammad Naazir Ali Naazir

umangon par hai ab un ki javaani
khush aae kyuun na itraanaa kisi kaa

— Mohammad Naazir Ali Naazir

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

aasmaan jhaank rahaa hai 'khaalid'
chaand kamre mein mire utraa hai

— Khalid Sharif

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal