libaas badle nahin ham ne mausamon ki tarah — Mohsin Zaidi

agar chaman kaa koi dar khulaa bhi mere liye
sumum ban gai baad-e-sabaa bhi mere liye

— Mohsin Zaidi

koi kashti mein tanhaa jaa rahaa hai
kisi ke saath dariyaa jaa rahaa hai

— Mohsin Zaidi

koi akelaa to main saadgi-pasand na thaa
pasand us ne bhi rangon mein rang saada kiyaa

— Mohsin Zaidi

duur rahnaa thaa jab us ko 'mohsin'
mere nazdik vo aayaa kyuun thaa

— Mohsin Zaidi

jaise do mulkon ko ik sarhad alag karti hui
vaqt ne khat aisaa khinchaa mere us ke darmiyaan

— Mohsin Zaidi

tiir o kamaan aap bhi 'mohsin' sambhaaliye
jab dosti ki aaD mein khanjar dikhaai de

— Mohsin Zaidi

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri

chaand ne taan li hai chaadar-e-abr
ab vo kapDe badal rahi hogi

— Jaun Elia