koi kashti mein tanhaa jaa rahaa hai — Mohsin Zaidi

agar chaman kaa koi dar khulaa bhi mere liye
sumum ban gai baad-e-sabaa bhi mere liye

koi akelaa to main saadgi-pasand na thaa
pasand us ne bhi rangon mein rang saada kiyaa

duur rahnaa thaa jab us ko 'mohsin'
mere nazdik vo aayaa kyuun thaa

jaise do mulkon ko ik sarhad alag karti hui
vaqt ne khat aisaa khinchaa mere us ke darmiyaan

tiir o kamaan aap bhi 'mohsin' sambhaaliye
jab dosti ki aaD mein khanjar dikhaai de

libaas badle nahin ham ne mausamon ki tarah
ki zeb-e-tan jo kiyaa ek hi labaada kiyaa

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

mire khudaa mujhe thoDi si zindagi de de
udaas mere janaaze se jaa rahaa hai koi

vaqt ke qadr-daan ki nazron mein
zindagi mukhtasar nahin hoti