baad marne ke miri qabr pe aayaa 'ghaafil' — Munawar Khan Ghafil

sitaare gum hue khurshid niklaa
araq jab yaar ne ponchhaa jabin se

— Munawar Khan Ghafil

apne majnun ki zaraa dekh to be-parvaai
pairahan chaak hai aur fikr silaane ki nahin

— Munawar Khan Ghafil

kucha-e-jaanaan mein yaaro kaun suntaa hai miri
mujh se vaan phirte hain laakhon daad aur be-daad mein

— Munawar Khan Ghafil

kaun dariyaa-e-mohabbat se utar saktaa hai paar
kashti-e-farhaad aakhir koh se Takraa gai

— Munawar Khan Ghafil

jite-ji qadr bashar ki nahin hoti saahab
yaad aaegi tumhein meri vafaa mere baad

— Munawar Khan Ghafil

vasl mein bhi nahin majaal-e-sukhan
is rasaai pe naa-rasaa hain ham

— Munawar Khan Ghafil

mere khvaabon ke jharokon ko sajaate rahiye
na sahi vasl magar yaad to aate rahiye

— Jatinder Vir Yakhmi Jayaveer

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

koi viraani si viraani hai
dasht ko dekh ke ghar yaad aayaa

— Mirza Ghalib

yaad aai hai to phir TuuT ke yaad aai hai
koi guzri hui manzil koi bhuli hui dost

— Ahmad Faraz

tum se chhuT kar bhi tumhein bhulnaa aasaan na thaa
tum ko hi yaad kiyaa tum ko bhulaane ke liye

— Nida Fazli

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

— Zafar Iqbal