main be-hunar thaa magar sohbat-e-hunar mein rahaa — Nasir Zaidi

haan ye khataa hui thi ki ham uTh ke chal diye
tum ne bhi to palaT ke pukaaraa nahin hamein

— Nasir Zaidi

dekhaa use to aankh se aansu nikal paDe
dariyaa agarche khushk thaa paani tahon mein thaa

— Nasir Zaidi

vo yuun milaa hai ki jaise kabhi milaa hi na thaa
hamaari zaat pe jis ki inaayatein thiin bahut

— Nasir Zaidi

ye kis maqaam pe tanhaai saunpte ho mujhe
ki ab to tark-e-tamannaa kaa hausla bhi nahin

— Nasir Zaidi

raat sunsaan hai gali khaamosh
phir rahaa hai ik ajnabi khaamosh

— Nasir Zaidi

vo bhi kyaa din the ki jab ishq kiyaa karte the
ham jise chaahte the chuum liyaa karte the

— Nasir Zaidi