bahut saste mein insaan bik rahe hain — Nusrat Siddiqui

main to jaisaa bhi huun sab log mujhe jaante hain
tere baare mein bhi ik baat suni hai main ne

— Nusrat Siddiqui

kam hi nahin hue tire baare mein tabsire
gunjaaishein bahut hain tire khadd-o-khaal mein

— Nusrat Siddiqui

kis zarurat ko dabaaun kise puuraa kar luun
apni tankhvaah kai baar gini hai main ne

— Nusrat Siddiqui

ye saare haarne vaale bhi mere apne hain
kahin main ro na paDun taaliyaan bajaate hue

— Nusrat Siddiqui

tumhein bhi hai agar daa'vaa vafaa kaa
to phir koi bhi harjaai nahin hai

— Nusrat Siddiqui

main tere ta'aaqub mein kahaan tak chalaa aayaa
kaa'ba mire pichhe na kalisaa mire aage

— Nusrat Siddiqui

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

— Anjum Khaleeq

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi