baaton se phuul jhaDte the lekin khabar na thi — Quaiser Khalid

tere bin hayaat ki soch bhi gunaah thi
ham qarib-e-jaan tiraa hisaar dekhte rahe

— Quaiser Khalid

ho paae kisi ke ham bhi kahaan yuun koi hamaaraa bhi na huaa
kab Thahri kisi ik par bhi nazar kyaa chiiz hai shahr-e-khubaan bhi

— Quaiser Khalid

mohmal hai na jaanein to, samjhein to vazaahat hai
hai ziist faqat dhokaa aur maut haqiqat hai

— Quaiser Khalid

ab is tarah bhi rivaayat se inhiraaf na kar
badal agarche tu achchhaa na de, kharaab to de

— Quaiser Khalid

Daal di pairon mein us shakhs ke zanjir yahaan
vaqt ne jis ko zamaane mein uchhalte dekhaa

— Quaiser Khalid

kuchh tu hi bataa aakhir kyun-kar tire bandon par
har shab hai nai aafat har roz musibat hai

— Quaiser Khalid

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

qaatil tiri gali bhi badaun se kam nahin
jis ke qadam qadam pe mazaar-e-shahid hai

— Mushafi Ghulam Hamdani

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

— Nadeem Bhabha

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

— Irfan Sattar

ham ko is ki kyaa khabar gulshan kaa gulshan jal gayaa
ham to apnaa sirf apnaa aashiyaan dekhaa kiye

— Hasan Najmi Sikandarpuri