ham aise jaaeinge le kar balaaein duniyaa ki — Safar Naqvi

ham se tai hogaa zamaane mein bulandi kaa vaqaar
nok-e-neza se bhi ham niche nahin dekheinge

— Safar Naqvi

idhar vo sahraa mein khaak dhuntaa udhar vo dariyaa kinaare gum-sum
ajiib hote hain ye ta'alluq musaafiron ke musaafiron se

— Safar Naqvi

udaas aankhon ki viraan maang bharne ko
ye niind khvaab kaa sindur le ke aai hai

— Safar Naqvi

khuub jaantaa hai ye ik faqir haathon mein
kab hai be-kasi rakhnaa kab hai mo'jiza rakhnaa

— Safar Naqvi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

aasmaan jhaank rahaa hai 'khaalid'
chaand kamre mein mire utraa hai

— Khalid Sharif

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi