ham ko misraa k tang siine mein — Sarfraz Zahid

khiDki se jhaank kar kisi ne
manzar ko vaaqia banaayaa

kunein ki samt bulaa le na koi khvaab mujhe
main apne baap kaa sab se hasin beTaa huun

sab ko qudrat thi khush-kalaami par
khaamushi mein zabaan-daraaz thaa main

aansu nahin banaa so ham ne
ujlat mein qahqaha banaayaa

main tire daaein baaein rahtaa huun
ai mire saamne ki majburi

zinda ikaTThe ho rahe hain
lagtaa hai koi mar gayaa hai