uThte jaate hain bazm-e-aalam se — Taashshuq Lakhnavi

bahut muzir dil-e-aashiq ko aah hoti hai
isi havaa se ye kashti tabaah hoti hai

— Taashshuq Lakhnavi

mujh se kyaa puchhte ho daagh hain dil mein kitne
tum ko ayyaam-e-judaai kaa shumaar aataa hai

— Taashshuq Lakhnavi

mauj-e-dariyaa se balaa ki chaahiye kashti mujhe
ho jo bilkul naa-muvaafiq vo havaa paidaa karun

— Taashshuq Lakhnavi

dete phirte the hasinon ki gali mein aavaaz
kabhi aaina-farosh-e-dil-e-hairaan ham the

— Taashshuq Lakhnavi

har taraf hashr mein jhankaar hai zanjiron ki
un ki zulfon ke giraftaar chale aate hain

— Taashshuq Lakhnavi

muntazir tere hain chashm-e-khun-fishaan khole hue
baiThe hain dil bechne vaale dukaan khole hue

— Taashshuq Lakhnavi