Taashshuq Lakhnavi

ham kis ko dikhate shab-e-furqat ki udasi
sab khvab men the raat ko bedar hamin the

kabhi to shahidon ki qabron pe aao
ye sab ghar tumhare basa.e hue hain

aamad aamad hai khizan ki jaane vaali hai bahar
rote hain gulzar ke dar baghban khole hue

jis taraf baiThte the vasl men aap
usi pahlu men dard rahta hai

jalunga main ki dil us but ka ghair par aaya
uDegi aag ki patthar gira hai patthar par

vo khaDe kahte hain meri laash par
ham to sunte the ki niind aati nahin

bahut muzir dil-e-aashiq ko aah hoti hai
isi havaa se ye kashti tabaah hoti hai

mujh se kyaa puchhte ho daagh hain dil mein kitne
tum ko ayyaam-e-judaai kaa shumaar aataa hai

mauj-e-dariyaa se balaa ki chaahiye kashti mujhe
ho jo bilkul naa-muvaafiq vo havaa paidaa karun

dete phirte the hasinon ki gali mein aavaaz
kabhi aaina-farosh-e-dil-e-hairaan ham the

har taraf hashr mein jhankaar hai zanjiron ki
un ki zulfon ke giraftaar chale aate hain

muntazir tere hain chashm-e-khun-fishaan khole hue
baiThe hain dil bechne vaale dukaan khole hue