ye maanaa vo shajar sukhaa bahut hai — Tabish Mehdi

mire aibon ko ginvaayaa to sab ne
kisi ne meri gham-khvaari nahin ki

— Tabish Mehdi

takoge raah sahaaron ki tum miyaan kab tak
qadam uThaao ki taqdir intizaar mein hai

— Tabish Mehdi

der tak mil ke rote rahe raah mein
un se baDhtaa huaa faaslaa aur main

— Tabish Mehdi

ajnabi raaston par bhaTakte rahe
aarzuon kaa ik qaafilaa aur main

— Tabish Mehdi

paDosi ke makaan mein chhat nahin hai
makaan apne bahut unche na rakhnaa

— Tabish Mehdi

agar phulon ki khvaahish hai to sun lo
kisi ki raah mein kaanTe na rakhnaa

— Tabish Mehdi

apni anaa ki aaj bhi taskin ham ne ki
ji bhar ke us ke husn ki tauhin ham ne ki

— Iqbal Sajid

kyon tasavvur mein ji rahaa huun main
jab haqiqat mein mar hi jaanaa hai

— Divyansh Rawat

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

— Nadeem Bhabha

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

— Shams Deobandi

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

— Wali Aasi

ghurur bhi jo karun main to aajizi ho jaae
khudi mein lutf vo aae ki be-khudi ho jaae

— Riyaz Khairabadi