mohabbat mein shikaayat kar rahaa huun — Tripurari

kitni dilkash hain ye baarish ki phuvaarein lekin
aisi baarish mein miri jaan bhi jaa sakti hai

— Tripurari

jab se guzraa hai kisi husn ke baazaar se dil
dil ko mahsus ye hotaa hai ki baazaar huun main

— Tripurari

main tire jism ke jab paar nikal jaaungaa
vasl ki raat baDi ghaur-talab hogi vo

— Tripurari

jin se milnaa na huaa un se bichhaD kar roe
ham to aankhon ki har ik had se guzar kar roe

— Tripurari

kai laashein hain mujh mein dafn yaani
main qabristaan huun shuruaat hi se

— Tripurari

tum jise chaand kahte ho vo asl mein
aasmaan ke badan par koi ghaav hai

— Tripurari

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

kisi se ishq apnaa kyaa chhupaaein
mohabbat Tapki paDti hai nazar se

— Meer Mehdi Majrooh

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey