ye bipharti mauj andeshe samundar aur main — Tufail Chaturvedi

nafraton kaa aks bhi paDne na denaa zehan par
ye andheraa jaane kitnon kaa ujaalaa khaa gayaa

sabhi zakhmon ke Taanke khul gae hain
hamein hansnaa bahut mahngaa paDaa hai

safar anjaam tak pahunche to kaise
main apne raaste mein khud khaDaa huun

ham buzurgon ki rivaayat se juDe hain bhaai
nekiyaan kar ke kabhi phal nahin maangaa karte

har taraf phailaa huaa be-samt be-manzil safar
bhiiD mein rahnaa magar khud ko akelaa dekhnaa

vo mausamon par uchhaaltaa hai savaal kitne
kabhi to yuun ho ki aasmaan se javaab barse