Tanhai

khud apne se milne kaa to yaaraa na thaa mujh mein
main bhiiD mein gum ho gai tanhaai ke Dar se

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

itne ghane baadal ke pichhe
kitnaa tanhaa hogaa chaand

tanhaa rahne mein bhi koi uzr nahin hai
lekin us ke saath hi tanhaa rah saktaa huun

angDaai par angDaai leti hai raat judaai ki
tum kyaa samjho tum kyaa jaano baat miri tanhaai ki

meri chaadar to chhini thi shaam ki tanhaai mein
be-ridaai ko miri phir de gayaa tashhir kaun

laazim thaa ki dekho miraa rastaa koi din aur
tanhaa gae kyuun ab raho tanhaa koi din aur

tere hote hue aa jaati thi saari duniyaa
aaj tanhaa huun to koi nahin aane vaalaa

shab ki tanhaai mein ab to akasr
guftugu tujh se rahaa karti hai

achchhaa hai dil ke saath rahe paasbaan-e-aql
lekin kabhi kabhi ise tanhaa bhi chhoD de

har taraf har jagah be-shumaar aadmi
phir bhi tanhaaiyon kaa shikaar aadmi

mujh se chhuDvaae mire saare usuul us ne 'zafar'
kitnaa chaalaak thaa maaraa mujhe tanhaa kar ke

ham ahl-e-qafas tanhaa bhi nahin har roz nasim-e-subh-e-vatan
yaadon se moattar aati hai ashkon se munavvar jaati hai

kaav kaav-e-sakht-jaani haae-tanhaai na puchh
subh karnaa shaam kaa laanaa hai ju-e-shir kaa

hai aadmi bajaae khud ik mahshar-e-khayaal
ham anjuman samajhte hain khalvat hi kyuun na ho

ghalat hai aap na the ham-kalaam khalvat mein
adu se aap ki tasvir bolti hogi

teraa khayaal khvaab khvaab khalvat-e-jaan ki aab-o-taab
jism-e-jamil-e-o-naujavaan shaam-ba-khair shab-ba-khair

aao tum hi karo masihaai
ab bahalti nahin hai tanhaai

ek mahfil mein kai mahfilein hoti hain sharik
jis ko bhi paas se dekhoge akelaa hogaa

akelaa us ko na chhoDaa jo ghar se niklaa vo
har ik bahaane se main us sanam ke saath rahaa