ustaad-e-mohtaram ne ki islaah she'r ki — Usman Minai

ghamon par us ke kabhi e'tibaar mat karnaa
vo pyaaz kaaT ke aansu nikaal letaa hai

tumhaare chehre ki saari nasein tani hui hain
tumhaare haath mein kyaa aaina diyaa gayaa hai

koi bashar kabhi paani banaa nahin saktaa
khudaa ke hone kaa pahlaa subut paani hai

didaar ke sikke jo zaraa bhikh mein maange
to us ne kahaa jaao jumeraat ko aanaa

neze ki nok teraa tah-e-dil se shukriya
ab tak giraa nahin hai miraa sar zamin par

nishaan kyon DhunDhte ho ungliyon ke
qazaa aai thi dastaane pahan kar