parda aankhon se haTaane mein bahut der lagi — Yasmeen Hameed

musalsal ek hi tasvir chashm-e-tar mein rahi
charaagh bujh bhi gayaa raushni safar mein rahi

ek divaar uThaai thi baDi ujlat mein
vahi divaar giraane mein bahut der lagi

jis samt ki havaa hai usi samt chal paDein
jab kuchh na ho sakaa to yahi faisla kiyaa

apni nigaah par bhi karun e'tibaar kyaa
kis maan par kahun vo miraa intikhaab thaa

us imaarat ko giraa do jo nazar aati hai
mire andar jo khanDar hai use taamir karo

raste se miri jang bhi jaari hai abhi tak
aur paanv tale zakhm ki vahshat bhi vahi hai