jangal men udasi ke rahoge bhala kab tak — Arman Khan Arman

talkhiyan khun-e-jigar ki sha'iri men ghol kar
chand misre' laa.en hain ham bhi sunane ke liye

— Arman Khan Arman

na.e mizaj ke logon ko kis liye akhir
qadim taur-tariqon ke bas men rahna paDa

— Arman Khan Arman

kuchh lutf is tarah hai musalsal safar ke saath
manzil bhi samne ho to rasta na paa.e dil

— Arman Khan Arman

nazar to pher mire kaghazi badan ki taraf
abhi ye zarb-e-musalsal se tar-tar nahin

— Arman Khan Arman

sar qalam kar de sitamgar dast-o-bazu kaaT de
be-takalluf haq-ba-janib baat honi chahiye

— Arman Khan Arman

khar-zaron se marasim ke sabab phulon ko
dil ne chaha bhi to ruk kar nahin dekha ham ne

— Arman Khan Arman