ji men aata hai mai-kashi kiije — Munawar Khan Ghafil

agar uryani-e-majnun pe aata rahm laila ko
bana deti qaba vo chaak kar ke parda mahmil ka

— Munawar Khan Ghafil

nikla na dagh-e-dil se hamara to koi kaam
na vo charagh-e-dair na sham-e-haram hua

— Munawar Khan Ghafil

ba.ad marne ke miri qabr pe aaya 'ghafil'
yaad aa.i mire iisa ko dava mere ba.ad

— Munawar Khan Ghafil

jite-ji qadr bashar ki nahin hoti sahab
yaad aa.egi tumhen meri vafa mere ba.ad

— Munawar Khan Ghafil

lailatul-qadr hai har shab use har roz hai iid
jis ne mai-khane men mah-e-ramazan dekha hai

— Munawar Khan Ghafil

vasl men bhi nahin majal-e-sukhan
is rasa.i pe na-rasa hain ham

— Munawar Khan Ghafil