dilon ke biich ki divar gir bhi sakti thi — Nusrat Gwaliari

bolte rahte hain nuqush us ke
phir bhi vo shakhs kam-sukhan hai bahut

— Nusrat Gwaliari

bhuul jaane ka mujhe mashvara dene vaale
yaad khud ko bhi na main aa.uun kuchh aisa kar de

— Nusrat Gwaliari

vo andhi raah men bina.iyan bichhata raha
badan pe zakhm liye aur labon pe diin liye

— Nusrat Gwaliari

ham tiri talkh guftugu sun kar
chup hain lekin sabab samajhte hain

— Nusrat Gwaliari

milna paDta hai hamen khud se bhi ghairon ki tarah
us ne mahaul hi kuchh aisa bana rakkha hai

— Nusrat Gwaliari

kuchh ehtiyat parinde bhi rakhna bhuul ga.e
kuchh intiqam bhi andhi ne badtarin liye

— Nusrat Gwaliari