All Writings Of Abu Mohammad Syed Husain Saifi

"faḳhr samjhā dar-e-dildār pe mar jaane ko kaise dānā.ī ye sūjhī tire dīvāne ko nāz-bardāroñ pe sab naaz huā karte haiñ kaun taklīf diyā karte haiñ begāne ko kyoñ vasīle kī zarūrat ho tirī chāhat meñ kyā sikhātā hai mohabbat koī parvāne ko maiñ to jannat meñ bhī jaane kā kabhī naam na luuñ jab tak ā.eñgī na hūreñ mire le jaane ko us ke va.adoñ se ho kyā ḳhaak tasallī 'saifī' der lagtī hī nahīñ jis ke mukar jaane ko"

"na ho pahlū meñ jab dil zindagī kyā are ham kyā hamārī dil-lagī kyā ḳhayāl-e-ābrū hai nashshe meñ bhī are ham kyā hamārī be-ḳhudī kyā madad kuchh kar nahīñ sakte kisī kī are ham kyā hamārī dostī kyā kiyā karte haiñ sajde be-dilī se are ham kyā hamārī bandagī kyā taraddud meñ guzartā hai har ik din are ham kyā hamārī zindagī kyā samajhte haiñ adū bhī dost ham ko are ham kyā hamārī dushmanī kyā nasīhat bhī hai dil-āzār 'saifī' are ham kyā hamārī shā.erī kyā"

"usī chiiz kī koī izzat nahīñ zamāne ko jis kī zarūrat nahīñ sadāqat se jis ko mohabbat nahīñ ḳhudā kī qasam us ko rāhat nahīñ hamīñ se hai jitnī mohabbat hameñ kisī se bhī utnī mohabbat nahīñ ġhulāmī hī ne.amat ho jin ke liye tijārat meñ un ko masarrat nahīñ na.ī kaun sī chiiz duniyā meñ hai ye kahiye ki ab vo jahālat nahīñ vo duniyā ke jhagḌe baḌhā.egā kyā jise zikr-e-ḳhāliq se fursat nahīñ ye maanā ki hai dushman-e-bad ajal magar is se bachne kī sūrat nahīñ jo pahle the ab bhī vahī haiñ mire hamārī zabāñ hī meñ lazzat nahīñ ḳhudā kī zarūrat hai 'saifī' hameñ ḳhudā ko hamārī zarūrat nahīñ"

"paak bātin kā kyā kare koī dushman apnā huā kare koī jaan se jo aziiz haiñ un se na judā ho ḳhudā kare koī ġhair ke nek-o-bad se kyā matlab apnī dhun meñ rahā kare koī sair-e-bāġh-e-jahāñ meñ ai 'saifī' chashm-e-ibrat ko vā kare koī"

"nahīñ kaam aatī mohabbat kisī kī na aa.e kisī par tabī.at kisī kī koī kyā kare gardish-e-āsmāñ ko hameñ kab gavārā hai zillat kisī kī baḌī ye balā hai mohabbat ḳhudāyā na aa.e kisī par tabī.at kisī kī ye kahte na the tum se pahle hī 'saifī' nahīñ kaam aatī mohabbat kisī kī"

"ham salāmat haiñ to apnā ghar bhī hai zar bhī hai zar-gar bhī hai zevar bhī hai abr-e-naisāñ aa.e aur barse to phir gul bhī hai gulshan bhī hai gauhar bhī hai diid kī quvvat ho jab tak aañkh meñ mahr bhī hai mah bhī hai aḳhtar bhī hai baḳht jab tak barsar-e-iqbāl ho taḳht bhī hai taaj bhī hai sar bhī hai sāqi-e-mehvash agar ho mehrbāñ mai bhī hai miinā bhī hai sāġhar bhī hai maut kī āñkhoñ se jab tak duur haiñ chilqad-e-āhan bhī hai miġhfar bhī hai vaqt par qaa.em rahe himmat agar laT bhī hai patthar bhī hai ḳhanjar bhī hai aql jab tak pāsbāñ hai jaan kī ḳhauf bhī hai tars bhī hai Dar bhī hai quvvat-e-parvāz kuchh bhī hai to phir par bhī hai baazū bhī hai shahpar bhī hai shauq agar hai manzil-e-maqsūd kā rah bhī hai rahrav bhī hai rahbar bhī hai"

"rāt-din kashmakash-e-zulf-e-dutā meñ huuñ maiñ haa.e kis pech meñ aafat meñ balā meñ huuñ maiñ sub.h hote hī nikal chalne kā sāmān kiyā raat bhar ke liye is kohna-sarā meñ huuñ maiñ hosh aa.e haiñ buḌhāpe meñ javānī to ga.ī sub.h kā vaqt hai aur yād-e-ḳhudā meñ huuñ maiñ haa.e kis muñh se ho qismat ke bigaḌne kā gila apne afa.āl-e-kamīna kī sazā meñ huuñ maiñ bahut āsān thā ek ek ḳhatā kā karnā sab kī ab fikr hai aur dast-e-qazā meñ huuñ maiñ be-takalluf vahī kartā hai jo dil chāhe hai fikr merī na karo tum fuqarā meñ huuñ maiñ baat jo bas ga.ī dil meñ vo nikaltī kab hai chheḌiye mujh ko na 'saifī' juhlā meñ huuñ maiñ"

"ilm ko parhez-gārī chāhiye gulshanoñ ko ābiyārī chāhiye sab ko ḳhvāhish hai hukūmat kī magar himmatoñ meñ pā.edārī chāhiye ek bo kar kāTte haiñ jab hazār be-zaroñ kī kisht-kārī chāhiye gard ūñchī ho ke bantī hai ġhubār ḳhākiyoñ ko ḳhāksārī chāhiye tuḳhm bote hī nahīñ milte samar har jagah ummīd-vārī chāhiye hukmarānoñ ke liye hai lāzmī yuuñ to sab ko rāzdārī chāhiye kah rahe haiñ tajrabe europe ke ye auratoñ ko parda-dārī chāhiye aish kī jā ḳhush-dilī darkār hai ġham-kade meñ sogvārī chāhiye ḳhatm par har ranj ke jab aish hai āsiyoñ ko ashk-bārī chāhiye hākimoñ kī mehrbānī ke liye mehnat-o-ḳhidmat-guzārī chāhiye dīn-o-duniyā kī masarrat ke liye mard-o-zan meñ ḳhush-gavarī chāhiye afv ko hujjat se jab 'saifī' hai buġhz ḳhātiyoñ ko sharmsārī chāhiye"

"jahl haivān kī nishānī hai aql insān kī nishānī hai na karo shoḳhiyāñ ḳhudā ke saath kufr tuġhyān kī nishānī hai aql bhī kis ne dī hai pahchāno shukr īmān kī nishānī hai sa.ī lāzim hai but na ban jaao naql be-jān kī nishānī hai ḳhanda-rūī ke saath sab se milo ḳhulq insān kī nishānī hai dekh lete hī shauq se milnā jaan pahchān kī nishānī hai kufr-o-shirk-o-nifāq se bachnā ye musalmān kī nishānī hai mutakabbir se mat milo 'saifī' kibr shaitān kī nishānī hai"

"ḳhudā jab tak na chāhe kuchh kisī se ho nahīñ saktā valī se ho nahīñ saktā nabī se ho nahīñ saktā tavajjoh shart hai kyā aadmī se ho nahīñ saktā magar himmat hī karnā kāhilī se ho nahīñ saktā karūñ kyoñ iltijā ġhairoñ ke aage tañg-dastī kī badal Daale muqaddar ye kisī se ho nahīñ saktā agar jāhil kā parda hai to ahl-e-ilm kī zīnat magar nuqsān apnā ḳhāmushī se ho nahīñ saktā burā.ī us kī kar ke kyoñ karūñ maiñ apnā dil halkā mirā nuqsān jis kī dushmanī se ho nahīñ saktā pareshāñ muflisī se aap hī vo kyoñ na ho lekin faqīroñ ko jhiḌak denā sakhī se ho nahīñ saktā ghaTā.eñ yaas kī ummīd par jab tak na chhā jaa.eñ koī bezār apnī zindagī se ho nahīñ saktā usī zālim ne shāyad raaz merā kar diyā ifshā pate kī baat kahnā ajnabī se ho nahīñ saktā gunāhoñ se vahī Dartā hai jis ko ḳhauf-e-ḳhāliq hai fareb-e-nafs se bachnā sabhī se ho nahīñ saktā kalejā qais kā dil kohkan kā chāhiye 'saifī' kisī par jaan denā har kisī se ho nahīñ saktā"