Tulsidas

एक भरोसो एक बल एक आस बिस्वास
एक राम घन स्याम हित चातक तुलसीदास

दिएँ पीठि पाछें लगै सनमुख होत पराइ
तुलसी संपति छाँह ज्यों लखि दिन बैठि गँवाइ

तुलसी श्रीरघुबीर तजि करै भरोसो और
सुख संपति की का चली नरकहुँ नाहीं ठौर

बाहु बिटप सुख बिहँग थलु लगी कुपीर कुआगि
राम कृपा जल सींचिऐ बेगि दीन हित लागि

ब्यापि रहेउ संसार महुँ माया कटक प्रचंड
सेनापति कामादि भट दंभ कपट पाषंड

काम क्रोध लोभादि मद प्रबल मोह कै धारि
तिन्ह महँ अति दाश्न दुखद मायारूपी नारि

सकल काज सुभ समउ भल सगुन सुमंगल जानु
कीरति बिजय बिभूति भलि हियँ हनुमानहि आनु

नाम राम केा अंक है सब साधन हैं सून
अंक गएँ कछु हाथ नहिं अंक रहें दस गून

सोई सेंवर तेइ सुवा सेवत सदा बसंत
तुलसी महिमा मोह की सुनत सराहत संत

तिल पर राखेउ सकल जग बिदित बिलोकत लोग
तुलसी महिमा राम की कौन जानिबे जोग

संपति चकई भरत चक मुनि आयस खेलवार
तेहि निसि आश्रम पिंजाराँ राखे भा भिनुसार

जीव सीव सम सुख सयन सपनें कछु करतूति
जागत दीन मलीन सोइ बिकल बिषाद बिभूति