Shayari Of Ada Jafarey

"yahī nahīñ ki zaḳhm-e-jāñ ko chāra-jū milā nahīñ ye haal thā ki dil ko ism-e-ārzū milā nahīñ abhī talak jo ḳhvāb the charāġh the gulāb the vo rahguzar koī na thī ki jis pe tū milā nahīñ tamām umr kī masāfatoñ ke ba.ad hī khulā kabhī kabhī vo paas thā jo chaar sū milā nahīñ vo jaise ik ḳhayāl thā jo zindagī pe chhā gayā rifāqateñ thiiñ aur yuuñ ki rū-ba-rū milā nahīñ tamām ā.inoñ meñ aks the mirī nigāh ke bhare nagar meñ ek bhī mujhe adū milā nahīñ virāsatoñ ke haath meñ jo ik kitāb thī milī kitāb meñ jo harf hai sitāra-ḳhū milā nahīñ vo kaisī aas thī adā jo kū-ba-kū liye phirī vo kuchh to thā jo dil ko aaj tak kabhū milā nahīñ"

"taufīq se kab koī sarokār chale hai duniyā meñ faqat tāla-e-bedār chale hai Thahrūñ to chaTānoñ sī kaleje pe khaḌī hai jā.ūñ to mire saath hī dīvār chale hai har ġhuncha baḌe chaav se khiltā hai chaman meñ har daur kā mansūr sar-e-dār chale hai rañgoñ kī na ḳhushbū kī kamī hai dil-o-jāñ ko tosha jo chale saath vo ik ḳhaar chale hai dil ke liye bas aañkh kā me.aar bahut hai jo sikka-e-jāñ hai sar-e-bāzār chale hai hairat se shagūfoñ kī jhapaktī nahīñ āñkheñ kis aan se kāñToñ kā ḳharīdār chale hai ḳhurshīd vahāñ ham ne sulagte hue dekhe kirnoñ kā jis āshob meñ bevpār chale hai ik jumbish-e-mizhgāñ kī ijāzat bhī nahīñ hai dil saath chalā hai ki sitamgār chale hai the ḳhizr bhī lākhoñ yahāñ iisā bhī bahut the āzār jo dil kā hai so āzār chale hai"

"ḳhāmushī se huī fuġhāñ se huī ibtidā rañj kī kahāñ se huī koī taa.ir idhar nahīñ aatā kaisī taqsīr is makāñ se huī mausamoñ par yaqīn kyuuñ chhoḌā bad-gumānī to sā.ebāñ se huī be-nihāyat samundaroñ kā safar guftugū sirf bādbāñ se huī ye jo uljhī huī kahānī hai mo'tabar harf-e-rā.egāñ se huī dil kī ābādiyoñ ko pūchho ho raushnī barq-e-be-amāñ se huī tishnagī bebasī lab-e-dariyā merī pahchān hī vahāñ se huī itnī ujlī na thī ye rāhguzar naqsh-e-pā-e-balā-kashāñ se huī"

"vo lamha ki ḳhāmoshī-e-shab naġhma-sarā thī kānoñ pe garāñ dil ke dhaḌakne kī sadā thī jis moḌ pe chhoḌī hai sahāroñ kī tamannā kahte haiñ baḌā qahr vahī laġhzish-e-pā thī kyuuñ aaj dhuāñ ban ke ufuq-tā-ba-ufuq hai is saañs meñ kaliyoñ ke chaTakne kī sadā thī har lamha-e-betāb ne DhūñDī haiñ panāheñ gūñjī thī ḳhamoshī tirī āvāz to kyā thī har din ke sahīfe pe tirā naam likhā hai har shab kī jabīñ terā nishān-e-kaf-e-pā thī kyā kahte ki hoñToñ pe bas ik harf-e-vafā thā kyā kījiye har saañs jo ta.azīr-e-vafā thī uThte hue dekhā hai dhuāñ ātish-e-gul se kyā nik.hat-e-barbād jale dil kī duā thī kyā jāniye marnā bhī ravā hai ki nahīñ hai takvīn ke lab par mire jiine kī duā thī"

"ḳhalish-e-tīr-e-be-panāh ga.ī lījiye un se rasm-o-rāh ga.ī aap hī markaz-e-nigāh rahe jaane ko chār-sū nigāh ga.ī sāmne be-naqāb baiThe haiñ vaq.at-e-husn-e-mehr-o-māh ga.ī us ne nazreñ uThā ke dekh liyā ishq kī jur.at-e-nigāh ga.ī intihā-e-junūñ mubārakbād pursish-e-hāl gaah gaah ga.ī mar miTe jald-bāz parvāne apnī sī sham.a to nibāh ga.ī dil meñ azm-e-haram sahī lekin un ke kūche ko gar ye raah ga.ī"

"vahī nā-sabūrī-e-ārzū vahī naqsh-e-pā vahī jaada hai koī sañg-e-rah ko ḳhabar karo usī āstāñ kā irāda hai vahī ashk-e-ḳhūñ ke gulāb haiñ vahī ḳhaar ḳhaar hai pairahan na karam kī aas bujhī abhī na sitam kī dhuup ziyāda hai abhī raushnī kī lakīr sī sar-e-rahguzār hai jāñ-ba-lab kisī dil kī aas miTī nahīñ kahīñ ik darīcha kushāda hai tan-e-zaḳhm zaḳhm ko chhoḌ de mire chāragar mire mehrbāñ dil-e-dāġh daaġh kā hausla tirī marhamat se ziyāda hai jo nazar bachā ke guzar ga.e to na aa sakoge palaT ke tum baḌī mohtaram hai ye bebasī ki ḳhulūs-e-jāñ kā libāda hai yahī zindagī hai burī-bhalī ye kashīda sar ye barahna-pā na ġhubār-e-rāh se muzmahil na sukūn-e-jāñ kā i.aada hai mirā iftiḳhār vafā talak mujhe raas aa na sakā 'adā' tirā naam jis pe likhā rahā vo kitāb aaj bhī saada hai"

"be-gāngī-e-tarz-e-sitam bhī bahāna-sāz be-chārgī-e-karb-o-alam bhī bahāna-sāz kuchh but banā liye haiñ chaTTāneñ tarāsh kar dil bhī bahāna-sāz hai ġham bhī bahāna-sāz uzr-e-vafā ke saath jalāte rahe charāġh khultā hai ab ki dīda-e-nam bhī bahāna-sāz pābandī-e-rusūm-o-vafā bhī bahāna-ḳhū tark-e-vafā-o-sheva-e-ram bhī bahāna-sāz har lamha-e-hayāt kā tanhā rahā vajūd dildārī-e-nigāh-e-karam bhī bahāna-sāz kuchh duur saath saath the itnā to yaad hai sahrā-e-ġham meñ naqsh-e-qadam bhī bahāna-sāz sab se baḌā fareb hai ḳhud zindagī 'adā' is hīla-jū ke saath haiñ ham bhī bahāna-sāz"

"nigāh oT rahūñ kāsa-e-ḳhabar meñ rahūñ maiñ bujhte bujhte bhī pairāhan-e-sharar meñ rahūñ maiñ ḳhud hī roz tamannā meñ aap shām-e-firāq ajab nahīñ jo akelī bhare nagar meñ rahūñ sulag uThī to añdheroñ kā rakh liyā hai bharam jo raushnī hoñ to kyuuñ chashm-e-nauha-gar meñ rahūñ tamām umr safar meñ guzār duuñ apnī tamām umr tamannā-e-rahguzar meñ rahūñ likhā gayā mujhe āvāz-e-ḳhāmushī kī tarah ḳhud apnā aks banūñ sāya-e-hunar meñ rahūñ vo tishnagī thī ki shabnam ko hoñT tarse haiñ vo aab huuñ ki muqayyad guhar guhar meñ rahūñ 'adā' maiñ nik.hat-e-gul bhī na thī sabā bhī na thī ki mehmāñ sī rahūñ aur apne ghar meñ rahūñ"

"his nahīñ taḌap nahīñ bāb-e-atā bhī kyuuñ khule ham haiñ girafta-dil abhī ham se sabā bhī kyuuñ khule ab ye udaas din hameñ saath liye liye phire ḳhvāb bujhe to kyā rahā kaalī ghaTā bhī kyuuñ khule dil kā koī ziyāñ nahīñ jaañ kā mo.āmla nahīñ haath meñ ik diyā nahīñ mauj-e-havā bhī kyuuñ khule yaañ kisī rahguzar pe kuchh naqsh-e-qadam paḌe rahe qāsid-e-ḳhush-ḳhabar nahīñ shahr-e-sabā bhī kyuuñ khule umr tamām kaaT dī hasrat-e-kāḳh-o-kū liye mere tumhāre sāmne arz-o-samā bhī kyuuñ khule kūza-ba-kūza baT ga.iiñ jitnī bhī thiiñ sadāqateñ ḳhālī hatheliyoñ pe ab harf-e-duā bhī kyuuñ khule shiddat-e-raqs-e-ārzū apnā javāz aap thī merī nigāh par 'adā' merī ḳhatā bhī kyuuñ khule"

"mizāj-o-martaba-e-chashm-e-nam ko pahchāne jo tujh ko dekh ke aa.e vo ham ko pahchāne milā hai dard hameñ dard-āshnā kī tarah bhalā huā ki ḳhulūs-e-karam ko pahchāne hazār kos nigāhoñ se dil kī manzil tak koī fareb se dekhe to ham ko pahchāne ye ḳhud-fareb ujāle ye haath haath diye diye bujhāo ki insān ġham ko pahchāne bahut dinoñ to havāoñ kā ham ne ruḳh dekhā baḌe dinoñ meñ matā-e-qalam ko pahchāne"

"har ik darīcha kiran kiran hai jahāñ se guzre jidhar ga.e haiñ ham ik diyā aarzū kā le kar ba-tarz-e-shams-o-qamar ga.e haiñ jo merī palkoñ se tham na paa.e vo shabnamīñ mehrbāñ ujāle tumhārī āñkhoñ meñ aa ga.e to tamām raste nikhar ga.e haiñ vo duur kab thā harīm-e-jāñ se ki lafz o ma.anī ke naaz uThātī jo harf hoñToñ pe aa na paa.e vo ban ke ḳhushbū bikhar ga.e haiñ jo dard īsā-nafas na hotā to dil pe kyā e'tibār aatā kuchh aur paimāñ kuchh aur paikāñ ki zaḳhm jitne the bhar ga.e haiñ ḳhazīne jaañ ke luTāne vaale diloñ meñ basne kī aas le kar sunā hai kuchh log aise guzre jo ghar se aa.e na ghar ga.e haiñ jab ik nigah se ḳharāsh aa.ī zamāne bhar se gila huā hai jo dil dukhā hai to ranj saare na jaane kis kis ke sar ga.e haiñ shikast-e-dil tak na baat pahuñchī magar 'adā' kah sako to kahnā ki ab ke sāvan dhanak se āñchal ke rañg saare utar ga.e haiñ"

"zabāñ ko hukm nigāh-e-karam ko pahchāne nigah kā jurm ġhubār-e-alam ko pahchāne vo ek jaam kahāñ har kisī kī qismat meñ vo ek zarf ki e.ajāz-e-sam ko pahchāne matā-e-dard parakhnā to bas kī baat nahīñ jo tujh ko dekh ke aa.e vo ham ko pahchāne vo dil jo ḳhaak hue aaj tak dhaḌakte haiñ rah-e-vafā tire mojiz-raqam ko pahchāne sahar se pahle yahāñ āftāb ubhre haiñ ḳhulūs bandgī-e-chashm-e-nam ko pahchāne ye ḳhud-fareb ujāle ye haath haath diye diye bujhāo ki insān ġham ko pahchāne kisī ḳhayāl kā saaya kisī umiid kī dhuup koī to aa.e ki dil kaif-o-kam ko pahchāne hazār kos nigāhoñ se dil kī manzil tak koī qarīb se dekhe to ham ko pahchāne jo ham-safar bhī rahe haiñ sharīk-e-manzil bhī kuchh ajnabī to na the phir bhī kam ko pahchāne bahut dinoñ to havāoñ kā ham ne ruḳh dekhā baḌe dinoñ meñ matā-e-qalam ko pahchāne"