رکھے ہیں صحن غزل میں ریاضتوں کے چراغ اور ان سے ماند پڑے ہیں جو طاقچوں کے چراغ گداز ذہن پہ درویش دل ہے رقص کناں ہوائے وجد کی زد پر ہیں منطقوں کے چراغ انہیں جگائے رکھا نیند کی توقع نے تو ایسے بن گئیں وہ آنکھیں رتجگوں کے چراغ جب ایک ہاشمی شہزادہ ہند سے گزرا سپرد کرتا گیا سب کو منتوں کے چراغ بہ مثل رابعہ اک آئنے نے مجھ سے کہا کہ اپنے آپ کو پہچان سلسلوں کے چراغ اسے دکھایا گیا خواب کے دریچوں سے کہ کس منڈیر پہ جلتے ہیں حیرتوں کے چراغ نظر میں رکھ لیں ردا سے ڈھکے ہوئے سر کو علم کے سایہ میں رکھ دیں محبتوں کے چراغ یہ اور بات ہے لوگو جلیں جلیں نہ جلیں میں آزماتا نہیں شب میں دوستوں کے چراغ وہ چل پڑے گا مری مورتی کی سمت علی دھوئیں سے آگ پکڑ لیں گے معبدوں کے چراغ

غزل · Ghazal

vo dil hi kyaa hai jo baar-e-digar jalaayaa nahin

وہ دل ہی کیا ہے جو بار دگر جلایا نہیں میں سوچتا تھا جلا لوں گا پر جلایا نہیں کسی بدن سے محبت کا انتقام لیا دیے کو آگ دکھائی مگر جلایا نہیں وہ شخص جلنے پہ آمادہ ہو چکا تھا مگر جلانے والے نے کچھ سوچ کر جلایا نہیں خوشی بھی ہے کہ تری آگ کے حصار میں ہوں ملال بھی کہ مجھے وقت پر جلایا نہیں اس اک دیے پہ توجہ کی آنچ رہتی تھی میں جانتا تھا جلے گا اگر جلایا نہیں مجھے جلا کے وہ آتش گریز سوچتا ہے ابھی تو میں نے اسے باخبر جلایا نہیں ہماری آگ میں کوئی کشش تو ہے حیدرؔ ادھر بھی آگ لگی ہے جدھر جلایا نہیں

غزل · Ghazal

ghazal ki lau karun mahfil ke khair-khvaahon par

غزل کی لو کروں محفل کے خیر خواہوں پر اک اسم پڑھتا ہوں بیدلؔ کے خیر خواہوں پر مہک رہا ہے ریاضت کے شاخچے پہ گلاب گزر رہا ہے گراں کھل کے خیر خواہوں پر گھنیری شب میں سمندر جلال میں آیا اڑاؤ اب ہنسی ساحل کے خیر خواہوں پر انہیں عطا ہے فن معجزہ مگر یہ رمز کھلے کھلے نہ کھلے دل کے خیر خواہوں پر یہ کون مانتا میں پرتو صحیفہ ہوں یہ انکشاف ہوا مل کے خیر خواہوں پر سلام کرتے ہیں چادر نشیں سروں کو علی درود پڑھتے ہیں محمل کے خیر خواہوں پر

غزل · Ghazal

kisi ke baazu hamaare liye khule aise

کسی کے بازو ہمارے لیے کھلے ایسے کہ ہم پہ عقدۂ لاہوت کھل گیا جیسے جو آنکھ منظروں سے بے نیاز ہے وہ آنکھ تجلیوں کے لیے ہوشیار ہے ویسے اے خاک بر سر من کربلا پشیمانم یہ دل گریزاں نہیں زیست آشنا شے سے میں ساقی ہوتا تو اے ساقیا تڑپ جاتا کہ کوئی رند مرا تشنہ رہ گیا کیسے علیؔ وہ شاعرہ سم جانتی ہے راگوں کا غزل کشیدتی ہے آٹھ تال کی لے سے

غزل · Ghazal

kis liye dekh rahi ho mujhe hairaani se

کس لیے دیکھ رہی ہو مجھے حیرانی سے غنچہ کہلاتا ہے گل چاک گریبانی سے حسن واقف ہی بہت تھا فن عریانی سے ورنہ مائل میں کہاں ہوتا تھا آسانی سے اس لیے بھی میں فقیروں کی طرح رہتا ہوں کوئی نسبت ہے مری بے سر و سامانی سے بعض اوقات تو میں عالم ہو کو خود میں کھینچ لیتا ہوں تساہل کی فراوانی سے اے خدا ان کو یہ احساس نہ ہونے دینا کون معزول ہوا مسند سلطانی سے ایک وہ دور اداسی کا عجب دور تھا جب ایک پیشانی جڑی رہتی تھی پیشانی سے اک علیؔ نام کا سائل ہے کریموں کے کریم اور دربار میں پہنچا ہے پریشانی سے

غزل · Ghazal

mire vujud ke kas-bal nikaal dein saahib

مرے وجود کے کس بل نکال دیں صاحب میں چاہتا ہوں کہ اذن دھمال دیں صاحب زمیں کو جب بھی ضرورت نمود و نم کی ہو ہماری آنکھ سے آنسو نکال دیں صاحب میں آگہی کے سفر پر نکلنے والا ہوں نمو کو صوت نظر کو خیال دیں صاحب اٹا ہے گرد سے آئینۂ حیات مرا جو آپ چاہیں تو اس کو اجال دیں صاحب یہ ہار جیت تو قسمت کا کھیل ہوتا ہے بس آپ عشق میں سکہ اچھال دیں صاحب اگر کسی پہ نہیں کھل رہا ہمارا سخن اسے خیال کی ہیبت میں ڈال دیں صاحب میں دست ساقیٔ کوثر کو چومتا ہوں علیؔ یہ خواب ہے تو حقیقت میں ڈھال دیں صاحب

See all 8 Ghazals →

Similar Poets