Betab Dehlvi

qissa-e-vasl dilaa lab pe tu laanaa na kahin

قصہ وصل دلا لب پہ تو لانا نہ کہیں مجھ کو ڈر ہے کوئی سن لے یہ فسانہ نہ کہیں چھوڑے جاتا ہوں نشانی میں ترے پاس یہ دل جس طرح چاہے تو رکھیو پہ گنوانا نہ کہیں میں لگاوٹ جو لگا کرنے تو بولا وہ شوخ باتوں باتوں میں مجھے ہاتھ لگانا نہ کہیں میری وحشت سے منادی ہے یہ ناکوں پر آج دیکھیو شہر میں آوے وہ دوانا نہ کہیں چاندنی کی عجب اس وقت ہے کیفیت واہ زلف بکھرا کے تو مکھڑے کو چھپانا نہ کہیں

bulbul kharaab-o-khvaar hui yuun chaman ko chhoD

بلبل خراب و خوار ہوئی یوں چمن کو چھوڑ آوارہ جوں پھرے کوئی اپنے وطن کو چھوڑ اک روز میں نے اس بت عیار سے کہا لگ جا گلے سے روز کے تو مکر و فن کو چھوڑ لیلیٰ کو کیا ملا نہ ملی قیس سے اگر شیریں نے کیا حصول کیا کوہ کن کو چھوڑ بے تاب و بے قرار کی ہوتی ہے آہ بد کہنے کو میرے مان تو اس بانکپن کو چھوڑ بولا کہ چٹکیوں میں اڑاؤں گا جب تلک اڑ جائے مرغ روح نہ تیرے بدن کو چھوڑ