Jaleel Haider Lashari

band kar baiThe ho ghar radd-e-balaa ki khaatir

بند کر بیٹھے ہو گھر رد بلا کی خاطر ایک کھڑکی تو کھلی رکھتے ہوا کی خاطر بھینٹ چڑھتے رہے ہر دور میں انساں کتنے فرد واحد کی فقط جھوٹی انا کی خاطر ہر زبردست کا ہر ظلم سہا ہے میں نے زندگی محض تری حرص بقا کی خاطر ڈر جہنم کا نہ جنت کی ہوس ہے مجھ کو سر جھکایا ہے فقط تیری رضا کی خاطر میں سیہ بخت جسے مار کے اپنوں نے جلیلؔ غیر کو دوش دیا خون بہا کی خاطر

kai zamaanon se mujh mein jo dard bikhraa thaa

کئی زمانوں سے مجھ میں جو درد بکھرا تھا ذرا سی عمر میں اس نے کہاں سمٹنا تھا نہیں گلہ جو مجھے مل گیا ہے غم اتنا کبھی کسی نے تو آخر یہ درد سہنا تھا لگے تھے کانپنے جلاد کے جو دست و پا اجل سے مل کے گلے کوئی مسکرایا تھا خراج دیتا چلا آ رہا ہوں نسلوں سے یہ کس غنیم کے ہاتھوں میں اتنا ہارا تھا میں کب کا ٹوٹ کے حیدرؔ بکھر گیا ہوتا خدا کا شکر ترے درد کا سہارا تھا

tum dhuup se na dhuup ki yalghaar se bacho

تم دھوپ سے نہ دھوپ کی یلغار سے بچو دیوار گرنے والی ہے دیوار سے بچو رکھ دے نہ کاٹ کر کہیں سارے وجود کو خود ساختہ اناؤں کی تلوار سے بچو وہ دل کا ٹوٹنا تو کوئی واقعہ نہ تھا اب ٹوٹے دل کی کرچیوں کی دھار سے بچو ایسا نہ ہو کہ بوجھ سے سر ہی نہ اٹھ سکے تم بھیک میں ملی ہوئی دستار سے بچو

mire vajud mein vo is tarah samo jaae

مرے وجود میں وہ اس طرح سمو جائے جو میرے پاس ہے سب کچھ اسی کا ہو جائے ابھی تو آنکھ کے اندر ہے تیرتا آنسو ٹپک پڑا تو نہ گھر ہی کہیں ڈبو جائے خوشی ملے بھی تو یہ دل اداس رہتا ہے بس ایک خوف سا رہتا ہے کچھ نہ ہو جائے تمہیں یقیں ہے کہ منزل ہے دو ہی قدموں پر مجھے یہ ڈر ہے کہیں راستہ نہ کھو جائے تمام قافلہ اب جاگتا ہے اس ڈر سے کہیں امیر نہ غفلت کی نیند سو جائے کبھی تو خواب بھی تعبیر پا سکیں اپنے یہ دائروں کا سفر جو تمام ہو جائے

naakhudaa sakht khafaa garche hamin par the bahut

ناخدا سخت خفا گرچہ ہمیں پر تھے بہت ہم نے بھی عزم کے پہنے ہوئے زیور تھے بہت تو نے دستک ہی نہیں دی کسی دروازے پر ورنہ کھلنے کو تو دیوار میں بھی در تھے بہت اڑ نہیں پایا اگرچہ یہ فضا بھی تھی کھلی میرے اندر سے مجھے جکڑے ہوئے ڈر تھے بہت جیت تیرا ہی مقدر تھی سو تو جیت گیا ورنہ ہارے ہوئے لشکر میں سکندر تھے بہت خام تھی پیاس تری ورنہ تو اس دشت میں بھی ایک ایڑی کے رگڑنے پہ سمندر تھے بہت چھن گئی آنکھ سے حیرت کہ تری بستی میں ہر گھڑی رنگ بدلتے ہوئے منظر تھے بہت وقت کی موج ہمیں پار لگاتی کیسے ہم نے ہی جسم سے باندھے ہوئے پتھر تھے بہت

kaisi bakhshish kaa ye saamaan huaa phirtaa hai

کیسی بخشش کا یہ سامان ہوا پھرتا ہے شہر سارا ہی پریشان ہوا پھرتا ہے کیسا عاشق ہے ترے نام پہ قرباں ہے مگر تیری ہر بات سے انجان ہوا پھرتا ہے ہم کو جکڑا ہے یہاں جبر کی زنجیروں نے اب تو یہ شہر ہی زندان ہوا پھرتا ہے شب کو شیطان بھی مانگے ہے پناہیں جس سے صبح وہ صاحب ایمان ہوا پھرتا ہے جانے کب کون کسے مار دے کافر کہہ کے شہر کا شہر مسلمان ہوا پھرتا ہے