Mir Taqi Mir

sabz hotī hī nahīñ ye sarzamīñ
tuḳhm-e-ḳhvāhish dil meñ tū botā hai kyā

dil se shauq-e-ruḳh-e-nikū na gayā
jhāñknā-tāknā kabhū na gayā

bevafā.ī pe terī jī hai fidā
qahr hotā jo bā-vafā hotā

'mīr'-sāhib zamāna nāzuk hai
donoñ hāthoñ se thāmiye dastār

dikhā.ī diye yuuñ ki be-ḳhud kiyā
hameñ aap se bhī judā kar chale

kitnī bāteñ banā ke lā.ūñ lek
yaad rahtīñ tire huzūr nahīñ

shaam se kuchh bujhā sā rahtā huuñ
dil huā hai charāġh muflis kā

mat sahl hameñ jaano phirtā hai falak barsoñ
tab ḳhaak ke parde se insān nikalte haiñ

kuchh karo fikr mujh dīvāne kī
dhuum hai phir bahār aane kī

husn thā terā bahut ālam-fareb
ḳhat ke aane par bhī ik aalam rahā

dīdanī hai shikastagī dil kī
kyā imārat ġhamoñ ne Dhaa.ī hai

kyā kaheñ kuchh kahā nahīñ jaatā
ab to chup bhī rahā nahīñ jaatā