buraa mat maan itnaa hausla achchhaa nahin lagtaa — Aashufta Changezi

tujh se bichhaDnaa koi nayaa haadsa nahin
aise hazaaron qisse hamaari khabar mein hain

— Aashufta Changezi

ye baat yaad rakheinge talaashne vaale
jo us safar pe gae lauT kar nahin aae

— Aashufta Changezi

arse se is dayaar ki koi khabar nahin
mohlat mile to aaj kaa akhbaar dekh lein

— Aashufta Changezi

kyuun khilaune TuTne par aab-dida ho gae
ab tumhein ham kyaa bataaein kyaa pareshaani hui

— Aashufta Changezi

ek manzar mein lipTe badan ke sivaa
sard raaton mein kuchh aur dikhtaa nahin

— Aashufta Changezi

sabhi ko apnaa samajhtaa huun kyaa huaa hai mujhe
bichhaD ke tujh se ajab rog lag gayaa hai mujhe

— Aashufta Changezi

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

— Ahmad Faraz

dasht-e-junun ki khaak uDaane vaalon ki himmat dekho
TuuT chuke hain andar se lekin man-maani baaqi hai

— Kumar Pashi

bhaarat ke ai saputo himmat dikhaae jaao
duniyaa ke dil pe apnaa sikka biThaae jaao

— Lal Chand Falak

vaqt ki gardishon kaa gham na karo
hausle mushkilon mein palte hain

— Mahfuzur Rahman Adil

tohmat si liye phirte hain sadiyon se sar apne
rusvaa hai bahut naam yahaan ahl-e-hunar kaa

— Majid Siddiqui

khudaayaa jazba-e-dil ki magar taasir ulTi hai
ki jitnaa khinchtaa huun aur khinchtaa jaae hai mujh se

— Mirza Ghalib