Wafa

nahin shikva mujhe kuchh bevafaai kaa tiri hargiz
gilaa tab ho agar tu ne kisi se bhi nibhaai ho

zindagi hai yaa koi tufaan hai!
ham to is jiine ke haathon mar chale

phir usi bevafaa pe marte hain
phir vahi zindagi hamaari hai

jo talab pe ahd-e-vafaa kiyaa to vo aabru-e-vafaa gai
sar-e-aam jab hue muddai to savaab-e-sidq-o-vafaa gayaa

kaun uThaaegaa tumhaari ye jafaa mere baad
yaad aaegi bahut meri vafaa mere baad

ab zamaana hai bevafaai kaa
siikh lein ham bhi ye hunar shaayad

khajil charaaghon se ahl-e-vafaa ko honaa hai
ki sarfaraaz yahaan phir havaa ko honaa hai

jo sazaa diije hai bajaa mujh ko
tujh se karni na thi vafaa mujh ko

mehndi mire lahu ki mubaarak ho aap ko
rang-e-hinaa hai is mein aur bu-e-vafaa bhi hai

lo phir tire labon pe usi bevafaa kaa zikr
ahmad 'faraaz' tujh se kahaa na bahut huaa

bevafaa kahiye baa-vafaa kahiye
dil mein aae jo barmalaa kahiye

main kis liye tujhe ilzaam-e-bevafaai duun
ki main to aap hi patthar huun apne raste kaa

ham arz-e-vafaa bhi kar na sake kuchh kah na sake kuchh sun na sake
yaan ham ne zabaan hi kholi thi vaan aankh jhuki sharmaa bhi gae

aashnaa bevafaa nahin hotaa
bevafaa aashnaa nahin hotaa

sarak ai mauj salaamat to rah-e-saahil le
tujh ko kyaa kaam jo kashti miri tufaan mein hai

gar ye aansu hain to laakh aaveinge dariyaa josh mein
gar ye aankhein hain to dikhlaaveingi tufaan saikaDon

unhon ne kyaa na kiyaa aur kyaa nahin karte
hazaar kuchh ho magar ik vafaa nahin karte

jafaa se unhon ne diyaa dil pe daagh
mukammal vafaa ki sanad ho gai

vo kareinge vasl kaa vaada vafaa
rang gahre hain hamaari shaam ke

vo kahte hain ye saari bevafaai hai mohabbat ki
na 'muztar' be-vafaa main huun na 'muztar' be-vafaa tum ho