dil diyaa vahshat liyaa aur khud ko rusvaa kar liyaa — Abdullateef Shauq

dard bakhshaa chain chhinaa dil ke TukDe kar diye
haae kis zaalim pe main ne bhi bharosa kar liyaa

— Abdullateef Shauq

mujh ko kisi yazid ki baiat nahin qubul
neze ye rakkho aao miraa sar bhi le chalo

— Abdullateef Shauq

takhrib ke parde mein hi taamir hai saaqi
shisha koi pighlaa hai to paimaana banaa hai

— Abdullateef Shauq

apni surat dekhnaa ho apne dil mein dekhiye
dil saa duniyaa mein koi bhi aaina miltaa nahin

— Abdullateef Shauq

but yahaan milte nahin hain yaa khudaa miltaa nahin
azm mustahkam to ho duniyaa mein kyaa miltaa nahin

— Abdullateef Shauq

takmil-e-vafaa hosh mein mumkin hi nahin thaa
divaana samajh buujh ke divaana banaa hai

— Abdullateef Shauq

kam-umri mein sunet hain
mar jaate hain achchhe log

— Malikzada Javed

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

— Arshad Jamal Sarim

zindagi ke bahut qarib na jaa
faasla kuchh to apne dhyaan mein rakh

— Akmal Imaam

umr bhar kaun nibhaataa hai ta'alluq itnaa
ai miri jaan ke dushman tujhe allaah rakkhe

— Ahmad Faraz

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

— Irfan Sattar

apne man mein Duub kar paa jaa suraagh-e-zindagi
tu agar meraa nahin bantaa na ban apnaa to ban

— Allama Iqbal