us ki aankhon ke vasf kyaa likkhun — Ahmad Javaid

ek aansu se kami aa jaaegi
ghaaliban dariyaaon ke iqbaal mein

— Ahmad Javaid

ajab safar thaa ajab-tar musaafirat meri
zamin shuru hui aur main tamaam huaa

— Ahmad Javaid

dil se baahar aaj tak ham ne qadam rakkhaa nahin
dekhne mein zaahiraa lagte hain sailaani se ham

— Ahmad Javaid

duniyaa mire paDos mein aabaad hai magar
meri duaa-salaam nahin us zalil se

— Ahmad Javaid

sukh ki khaatir dukh mat bech
jaal ke pichhe jaal na Daal

— Ahmad Javaid

gahvaara-e-safar mein khuli hai hamaari aankh
taamir apne ghar ki hui sang-e-mil se

— Ahmad Javaid

mere khvaabon ke jharokon ko sajaate rahiye
na sahi vasl magar yaad to aate rahiye

— Jatinder Vir Yakhmi Jayaveer

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa

— Zafar Iqbal

khvaab Thahre the to aankhein bhigne se bach gaiin
varna chehre par to gham ki baarishon kaa aks hai

— Malika Naseem

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

— Abu Mohammad Sahar

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

— Aleena Itrat

ik yaqin-parvar gumaan aur ik hayaat-aamez khvaab
jaise koi aaegaa aur uljhanein le jaaegaa

— Asim Nadeem Asi