gahvaara-e-safar mein khuli hai hamaari aankh — Ahmad Javaid

ajab safar thaa ajab-tar musaafirat meri
zamin shuru hui aur main tamaam huaa

dil se baahar aaj tak ham ne qadam rakkhaa nahin
dekhne mein zaahiraa lagte hain sailaani se ham

duniyaa mire paDos mein aabaad hai magar
meri duaa-salaam nahin us zalil se

sukh ki khaatir dukh mat bech
jaal ke pichhe jaal na Daal

dil-e-betaab ke hamraah safar mein rahnaa
ham ne dekhaa hi nahin chain se ghar mein rahnaa

ek aansu se kami aa jaaegi
ghaaliban dariyaaon ke iqbaal mein

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

aur bhi to hain zamaane mein tumhaare aashiq
ek main hi tumhein kyaa qaabil-e-ilzaam milaa