hamein aakhirat mein 'aamir' vahi umr kaam aai — Amir Usmani

aql thak kar lauT aai jaada-e-aalaam se
ab junun aaghaaz farmaaegaa is anjaam se

— Amir Usmani

thi siyaahiyon kaa maskan miri zindagi ki vaadi
tire husn ke tasadduq mujhe raushni dikhaa di

— Amir Usmani

ye qadam qadam balaaein ye savaad-e-ku-e-jaanaan
vo yahin se lauT jaae jise zindagi ho piyaari

— Amir Usmani

chand alfaaz ke moti hain mire daaman mein
hai magar teri mohabbat kaa taqaazaa kuchh aur

— Amir Usmani

baaqi hi kyaa rahaa hai tujhe maangne ke baad
bas ik duaa mein chhuT gae har duaa se ham

— Amir Usmani

ishq sar-taa-ba-qadam aatish-e-sozaan hai magar
us mein shola na sharaara na dhuaan hotaa hai

— Amir Usmani

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq