janaab ke rukh-e-raushan ki diid ho jaati — Anwar Shuoor

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

— Anwar Shuoor

zamaane ke jhamelon se mujhe kyaa
miri jaan! main tumhaaraa aadmi huun

— Anwar Shuoor

divaar-e-zindaan ke pichhe
jurm-e-mohabbat mein baiThaa huun

— Anwar Shuoor

miri hayaat hai bas raat ke andhere tak
mujhe havaa se bachaae rakho savere tak

— Anwar Shuoor

kabhi rotaa thaa us ko yaad kar ke
ab aksar be-sabab rone lagaa huun

— Anwar Shuoor

aadmi ke liye ronaa hai baDi baat 'shuur'
hans to sakte hain sab insaan hansi mein kyaa hai

— Anwar Shuoor

roza-daaraan-e-judaai kuun kham-e-abru-e-yaar
maah-e-id-e-ramazaan thaa mujhe maalum na thaa

— Siraj Aurangabadi

iid par masrur hain donon miyaan biivi bahut
ik kharidaari se pahle ik kharidaari ke baad

— Sarfaraz Shahid

muddaton baa'd kabhi ai nazar aane vaale
iid kaa chaand na dekhaa tiri surat dekhi

— Manzar Lakhnavi

rahnaa pal pal dhyaan mein
milnaa iid ke iid mein

— Hasan Shahnawaz Zaidi

iid mein iid hui aish kaa saamaan dekhaa
dekh kar chaand jo munh aap kaa ai jaan dekhaa

— Shad Azimabadi

ham bhi usi ke saath gae hosh se 'said'
lamha jo qaid-e-vaqt se baahar chalaa gayaa

— Saeed Ahmad