Eid

iid par masrur hain donon miyaan biivi bahut
ik kharidaari se pahle ik kharidaari ke baad

muddaton baa'd kabhi ai nazar aane vaale
iid kaa chaand na dekhaa tiri surat dekhi

roza-daaraan-e-judaai kuun kham-e-abru-e-yaar
maah-e-id-e-ramazaan thaa mujhe maalum na thaa

vahaan iid kyaa vahaan diid kyaa
jahaan chaand raat na aai ho

iid hai ham ne bhi jaanaa ki na hoti gar iid
mai-farosh aaj dar-e-mai-kada kyuun vaa kartaa

iid ke baa'd vo milne ke liye aae hain
iid kaa chaand nazar aane lagaa iid ke baad

rahnaa pal pal dhyaan mein
milnaa iid ke iid mein

kyaa lutf-e-id hai jo agar tum se duur hon
guzregaa roz-e-id tasavvur mein aap ke

iid mein iid hui aish kaa saamaan dekhaa
dekh kar chaand jo munh aap kaa ai jaan dekhaa

ham bhi usi ke saath gae hosh se 'said'
lamha jo qaid-e-vaqt se baahar chalaa gayaa

vahi din hai hamaari iid kaa din
jo tiri yaad mein guzartaa hai

eid ab ke bhi gai yunhi kisi ne na kahaa
ki tire yaar ko ham tujh se milaa dete hain

vaadon hi pe har roz miri jaan na Taalo
hai eid kaa din ab to gale ham ko lagaa lo

eid tu aa ke mire ji ko jalaave afsos
jis ke aane ki khushi ho vo na aave afsos

hai eid kaa din aaj to lag jaao gale se
jaate ho kahaan jaan miri aa ke muqaabil

jis taraf tu hai udhar hongi sabhi ki nazrein
iid ke chaand kaa didaar bahaana hi sahi

rahmat agar qubul kare kyaa baiid hai
sharmindagi se uzr na karnaa gunaah kaa

khuun ho jaaein khaak mein mil jaaein
hazrat-e-dil se kuchh baiid nahin

kahte hain eid hai aaj apni bhi eid hoti
ham ko agar mayassar jaanaan ki diid hoti

tu aae to mujh ko bhi
iid kaa chaand dikhaai de