rahnaa pal pal dhyaan mein — Hasan Shahnawaz Zaidi

ye sukhe patte nahin zamaane pe tabsire hain
shajar ne likh kar bikher di hain fazaa mein baatein

vo mire kaase mein yaadein chhoD kar yuun chal diyaa
jis tarah alfaaz jaate hon muaani chhoD kar

chehron ko pairon se kuchal kar aage baDh jaanaa
jiit isi ko kahte hain to phir main haar gayaa

titliyaan phuul mein kyaa DhunDhti rahti hain sadaa
kyaa kahin baad-e-sabaa rakh gai paighaam tiraa

''jo bhi aave hai vo nazdik hi baiThe hai tire''
shisha-e-chashm mein kis kis ko utaaraa huaa hai

us ki aankhon mein mohabbat kaa gumaan tak nahin aaj
kaun si aag thi kal jis kaa dhuaan tak nahin aaj

muddaton baa'd kabhi ai nazar aane vaale
iid kaa chaand na dekhaa tiri surat dekhi

eid kaa chaand jo dekhaa to tamannaa lipTi
un se taqrib-e-mulaaqaat kaa rishta niklaa

mujh ko to iid mein bhi faraaghat kahaan mili
laDti rahi hai saas savere se shaam tak

iid kaa din to hai magar 'jaafar'
main akele to hans nahin saktaa

nikle hain ghar se dekhne ko log maah-e-id
aur dekhte hain abru-e-khamdaar ki taraf

eid ab ke bhi gai yunhi kisi ne na kahaa
ki tire yaar ko ham tujh se milaa dete hain