suni andheron ki sugbugaahaT to shaam yaadon ki kahkashaan se — Aqeel Nomani

puchho zaraa ye kaun si duniyaa se aae hain
kuchh log kah rahe hain hamein koi gham nahin

— Aqeel Nomani

anginat safinon mein diip jagmagaate hain
raat ne luTaayaa hai rang-o-nur paani par

— Aqeel Nomani

ab sang-baariyon kaa amal sard paD gayaa
ab us taraf bhi ranj mire TuTne kaa hai

— Aqeel Nomani

be-sabab donon mein har ek ko dilchaspi thi
aur har ek se bezaar the ham bhi tum bhi

— Aqeel Nomani

hamein bhi vaqt ke tufaan mil kar khaa gae aakhir
har ik kashti ko mil jaataa hai saahil ham bhi kahte the

— Aqeel Nomani

jis ko chaahaa bas usi kaa raasta takte rahe
pattharon ki justuju mein khud ko patthar kar liyaa

— Aqeel Nomani

mere khvaabon ke jharokon ko sajaate rahiye
na sahi vasl magar yaad to aate rahiye

— Jatinder Vir Yakhmi Jayaveer

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

yaad aai hai to phir TuuT ke yaad aai hai
koi guzri hui manzil koi bhuli hui dost

— Ahmad Faraz

koi viraani si viraani hai
dasht ko dekh ke ghar yaad aayaa

— Mirza Ghalib

ek parchhaain tasavvur ki mire saath rahe
main tujhe bhulun magar yaad mujhe tu aae

— Gulnar Aafreen

tumhaari yaad nikalti nahin mire dil se
nasha chhalaktaa nahin hai sharaab se baahar

— Faheem Shanas Kazmi