Chaand

justuju khoe huon ki umr bhar karte rahe
chaand ke hamraah ham har shab safar karte rahe

chaand ne taan li hai chaadar-e-abr
ab vo kapDe badal rahi hogi

itne ghane baadal ke pichhe
kitnaa tanhaa hogaa chaand

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

bachchon ke chhoTe haathon ko chaand sitaare chhune do
chaar kitaabein paDh kar ye bhi ham jaise ho jaaeinge

yaqin chaand pe suraj mein e'tibaar bhi rakh
magar nigaah mein thoDaa saa intizaar bhi rakh

''aap ki yaad aati rahi raat bhar''
chaandni dil dukhaati rahi raat bhar

na itnaa zulm kar ai chaandni bahr-e-khudaa chhup jaa
tujhe dekhe se yaad aataa hai mujh ko maahtaab apnaa

supurd kar ke use chaandni ke haathon mein
main apne ghar ke andheron ko lauT aaungi

duur ke chaand ko DhunDo na kisi aanchal mein
ye ujaalaa nahin aangan mein samaane vaalaa

vaqt hai ab namaaz-e-maghrib kaa
chaand rukh lab shafaq hai gesu shaam

miri fazaa mein hai tartib-e-kaaenaat kuchh aur
ajab nahin jo tiraa chaand hai sitaara mujhe

har shai musaafir har chiiz raahi
kyaa chaand taare kyaa murgh o maahi

husn ko chaand javaani ko kanval kahte hain
un ki surat nazar aae to ghazal kahte hain

yuun sajaa chaand ki jhalkaa tire andaaz kaa rang
yuun fazaa mahki ki badlaa mire hamraaz kaa rang

raat ke shaayad ek baje hain
sotaa hogaa meraa chaand

ham itni raushni mein dekh bhi sakte nahin us ko
so apne aap hi is chaand ko gahnaae rakhte hain

haae vo log gae chaand se milne aur phir
apne hi TuuTe hue khvaab uThaa kar le aae

ham na kahte the ki naqsh us kaa nahin naqqaash sahl
chaand saaraa lag gayaa tab nim-rukh surat hui

baat vo aadhi raat ki raat vo puure chaand ki
chaand bhi ain chait kaa us pe tiraa jamaal bhi